Exo 33 | NdeIBE | STEP | UJehova wasesithi kuMosi, “Suka kule indawo wena labantu owabakhupha elizweni laseGibhithe, uye elizweni engalithembisa u-Abrahama lo-Isaka loJakhobe ngifunga ngisithi, ‘Ngizalinika inzalo yakho.’

Exodus 33

1 UJehova wasesithi kuMosi, “Suka kule indawo wena labantu owabakhupha elizweni laseGibhithe, uye elizweni engalithembisa u-Abrahama lo-Isaka loJakhobe ngifunga ngisithi, ‘Ngizalinika inzalo yakho.’

2 Ngizathuma ingilosi ihambe phambi kwakho ixotshe amaKhenani, ama-Amori, amaHithi, amaPherizi, amaHivi lama-Jebusi.

3 Yana elizweni eligeleza uchago loluju lwezinyosi. Kodwa mina angiyikuhamba lani ngoba lingabantu abantamo zilukhuni, hlezi ngilibhubhise endleleni.”

4 Kwathi lapho abantu sebezwe amazwi la adabukisayo baqalisa ukukhala, akwaze kwaba khona owagqiza izigqizo zakhe. 5 Phela uJehova wayethe kuMosi, “Tshela abako-Israyeli uthi, ‘Lina lingabantu abantamo zilukhuni. Uma ngingahamba lani loba okomzuzwana nje, ngingalibhubhisa. Khathesi khumulani izigqizo zenu; ngizakwenza isinqumo ukuthi ngenzeni kini.’ ” 6 Ngakho-ke abako-Israyeli bazikhumula izigqizo zabo entabeni iHorebhi.

IThente LokuHlanganela

7 UMosi wayejwayele ukuthatha ithente ayelimisa ngaphandle bucwadlana lezihonqo. Walibiza ngokuthi “lithente lokuhlanganela.” Ubani lobani owayedinga uJehova wayesiya ethenteni lokuhlanganela ngaphandle kwezihonqo. 8 Kwakusithi-ke lapho uMosi ephuma esiya kulelothente abantu bonke babesukuma bame eminyango yamathente abo bakhangele uMosi aze angene ethenteni.

9 Kwakusithi uMosi esengena ethenteni insika yeyezi yehlele phansi ime emnyango wethente lapho uJehova ekhuluma loMosi. 10 Kwakusithi abantu bangabona insika yeyezi isimi emnyango wethente basukume bonke bakhonze; lowo lalowo emnyango wethente lakhe. 11 UJehova wayekhuluma loMosi ubuso ngobuso njengomuntu ekhuluma lomngane wakhe. Ngemva kwalokho uMosi wayebuyela ezihonqweni, kodwa umncedisi wakhe owayesesemncane, uJoshuwa kaNuni, wayengasuki ethenteni.

UMosi leNkazimulo kaJehova

12 UMosi wathi kuJehova, “Ube ulokhu ungitshela usithi, ‘Khokhela abantu laba,’ kodwa kawungazisanga ukuthi ngubani ozamthuma ukuba ahambe lami. Utshilo wathi, ‘Ngiyakwazi ngebizo, njalo ufumene umusa kimi.’ 13 Uma uthokoza ngami ngifundisa izindlela zakho ukuze ngikwazi, ngiqhubeke ngithola umusa kuwe. Khumbula futhi lokuthi isizwe lesi singabantu bakho.”

14 UJehova waphendula wathi, “NgoBukhona bami ngizahamba lawe ngikuphumuze.”

15 UMosi wathi kuye, “Uma uBukhona bakho bungahambi lathi, ungasisusi lapha. 16 Umuntu angakwazi njani ukuthi mina labantu bakho sifumene umusa kuwe ngaphandle kokuba uhamba lathi na? Kuyini okunye okungasiphawula, mina labantu bakho, kwabanye abantu bonke emhlabeni na?”

17 UJehova wathi kuMosi, “Ngizakwenza khona kanye lokhu okucelileyo ngoba ngiyathokoza ngawe, njalo ngikwazi ngebizo.”

18 UMosi wasesithi, “Ngicela ukuba ungitshengise inkazimulo yakho.”

19 UJehova wasesithi, “Ngizakwenza ubuhle bami budlule phambi kwakho, njalo ngizamemezela ibizo lami, uJehova, phambi kwakho. Ngizakuba lesihawu kulowo engilesihawu kuye, ngibe lesisa kulowo engizakuba lesisa kuye.

20 “Kodwa,” watsho uJehova, “ubuso bami awungeke ububone, ngoba kakho ongangibona aphile.”

21 UJehova wabuya wathi, “Kulendawo phansi kwami lapho ongema khona phezu kwedwala. 22 Kuzakuthi lapho inkazimulo yami isedlula eduze, ngizakufaka engoxweni yedwala ngikusithe ngesandla sami ngize ngidlule.

23 Emva kwalokho ngizasusa isandla sami ubone umhlane wami; kodwa ubuso bami akumelanga ububone.”